ทานํ ตาณํ มนุสฺสานํ, ทานํ ทุคฺคติวารณํ;

ทานํ สคฺคสฺส โสปานํ, ทานํ สนฺติกรํ ปรํฯ

[2]

อิจฺฉิติจฺฉิตทาเนน, ทานํ จินฺตามณี วิย;

กปฺปรุกฺโขว สตฺตานํ, ทานํ ภทฺทฆโฏวิยฯ

[3]

สีลวนฺตสฺส ทาเนน, จกฺกวตฺติสิริมฺปิ จ;

ลภนฺติ สกฺกสมฺปตฺติํ, ตถา โลกุตฺตรํ สุขํฯ

[4]

ปาปกมฺเมสุ นิรโต, ฐิโตยํ นรกายเน [นรกาวเน อิติปิกตฺถจิ];

สาริปุตฺตสฺส เถรสฺส, ปิณฺฑปาตสฺส วาหสาฯ

[5]

อปายํ ปริวชฺเชตฺวา, เนกทุกฺขสมากุลํ;

เทวสงฺฆปริพฺพูฬฺโห, คโต เทวปุรํ วรํฯ

[6]

ตสฺมา สุเขตฺเต สทฺธาย, เทถ ทานานิ กามทํ;

ทานํ เทนฺเตหิ สีลมฺปิ, ปาลนียํติสุนฺทรนฺติ [ปาลนํจาติสุนฺทรํ อิติปิกตฺถจิ]ฯ

อถ ภิกฺขู ธมฺมสภายํ สนฺนิปติตฺวา นิสินฺนา ภควนฺตํ ปุจฺฉิํสุ, กิํภนฺเต โส ปาโป จตูสุ อปาเยสุ กตรสฺมิํ นิพฺพตฺโตติฯ อถ สตฺถา อชฺเชส ภิกฺขเว สาริปุตฺตสฺส ทินฺนทานานุภาเวน เทวโลเก นิพฺพตฺโต, ตสฺเสว นิสฺสนฺเทน อนาคเต ปจฺเจกพุทฺโธ ภวิสฺสตีติ พฺยากาสีติฯ

[7]

โภ สาริปุตฺเต นิหิตปฺปทานํ,

ขเณน ปาเปติ หิ สคฺคมคฺคํ;

ตสฺมา สุเขตฺเตสุ ททาถ ทานํ,

กามตฺถ เจ สคฺคโมกฺขํ ปรตฺถฯ

โจรฆาตกวตฺถุํ ฉฏฺฐมํฯ

27. สทฺโธปาสกสฺส วตฺถุมฺหิ อยมานุปุพฺพีกถา